Revelation of John 2
Opora fain wi Efesus wia sesekomak
1Mua nain-ke efa maakek, “Ensel wi Efesus sios teeria wia urufiya nain opora feenap siisimoma, ‘Mua nain-ke nefa maek, o eena mokoma ikur okaiwi-pa erup wapen akena-pa opap ikok arua ikur okaiwi-pa erup nain gone-pa ikip ekapep naem-ikua nain-ke nefa maek.’ 2Feenap wia siisimoma, ‘Ni sira eliwa feenap oniman fain yo niar amisarem. Ni uuwowa maneka kekanep onami yoowa aawem-ikaiman nain pun niar amisarem. Ne fain pun amisarem, ni wi sira samora onimik nain sira iiwawun wiar miatiniman. Wi oram iinan-pa aposel wiam naimik nain wia akimaman-na wia, wi oram wadolalimik. 3Ne ni kekanep ikeman, yo muuta nain yoowa maneka aaweman nain me efa piipuaman.4Aria sira kuisow fain nia siririyem, moram ni iiriw manek akena efa kookalem-ikeman ne aakisa wia. 5Naapeya ni manek akena wakieman nain kema suuweka! Ni kema kirep iiriw onam-ikeman naap efa onam-ikeka. Weetakeya-na yo ekap arua nain niar iirarinen. 6Aria ni sira fain oniman nain eliwa, yo wi Nikolas teeria wadol sira onimik nain wiar miatiniyem, ne nis pun miatiniman.
7Ni ifan onaiya ikok-na Ewar Eliwa-ke wi sios wia maakiya nain wiar miimam-ikeka! Feenap, wi nomakimik nain yo ikoka eliw wia naomkun nomokowa oko makena enimikuan, eena enep anane eliw ikowa nain. Nomokowa eena Mua Maneka ona owow eliwa-pa upok nain.’”
Opora fain wi Smerna wia sesekomak
8“Opora fain ensel wi Smerna sios teeria wia urufiya nain siisimoma. ‘Mua makena maa unowa onoma os, ne maa unowa weeserowa pun os. O iiriw umep kiiriw iikirak. Aakisa anane maneka naap ikaiya. 9Opora feenap nia maek, ni yoowa aawem-ikeman nain niar amisarem. Ne ni maa marew akena ikeman nain pun. Nain ni yo teeria-pa ikeman nain maa unowa saarik ikeman. Ne fain pun niar amisarem, wi teeria oko-ke nia firekimik. Wi nain wi Yuuda wiam naimik nain me makena-ke. Wi wiam fiirimimik nain Satan wiar fiirimimik. 10Ni yoowa sira kamenap aawowa nain me keker opaka. Miimeka! Ikoka Satan teeria-ke papako nia akimu naep nia samorami koora-pa nia wuikuan. Naap nia samorimik nain epa ekinon, fofa ten kuisow ikiweya niar weeserinon. Ni kekanep opora efar opam-ikeka. Wi eliw nia ifakimikuan, nain ni kekanep opora efar opam-ikeka. Naeya nia saliwamkun ni anane maneka eliwa ikowen.11Ni ifan onaiya ikok-na Ewar Eliwa-ke wi sios wia maakiya nain wiar miimam-ikeka! Wi teeria kekanep nomakimik nain wi umep wiimar epa samora me ikiwikuan.’”
Opora fain wi Pergamum wia sesekomak
12“Opora fain ensel wi Pergamum sios teeria wia urufiya nain sesekoma, ‘Mua bainat maala anima oko-okaiwi-pa wiar ikua nain feenap nia maek. 13Yo nia amisarem, makena, ni Satan urufiya epa neeke wiar ikeman. Nain ni kekanep yo opora efar ookam-ikaiman, ne me efa sailiman. Iiriw yo opor aakunow mua eliwa Antipas ni owowa-pa ifakimemik, owowa eena Satan ikaiya nan. Iir nain yo me efa piipuaman.14Nain yo sira fain nia siririyem, ni papako Baalam sira wiar ookiman. Iiriw eker mua nain-ke Balak maakeya wi Isrel sira samora onami enum erua kema wia mikam-ikua. Ne pun wi inasina patirimik maa enowa nain enowa wia suuwam-ikua. 15Ne aakisa ni teeria pun naap, ni mua papako wi Nikolas teeria opora wia miimap naap onam-ikaiman. 16Ni sira nain piipuap kema kireka! Weetakeya-na yo ewursow niar ekapep wi teeria naap onimik nain bainat opaimika-pa efar ikua nain-pa wiamiya irakinen.
17Ni ifan onaiya ikok-na Ewar Eliwa wi sios wia maakiya nain miimam-ikeka! Wi teeria eena kekanep nomakimik nain ikoka maa enowa maana naimik nain wienakinen. Ne pun mua unowa kuisow kuisow nomon kia eliwa nain wiinen. Nomona nain unum enuma ononer wiar siisimep-puam, unuma nain mua oko me wiar amisarek. Makena, mua eena nomona aawiya nain-ke amisarinon.’”
Opora fain wi Taiyataira wia sesekomak
18“Opora fain ensel wi Taiyataira sios teeria wia urufiya nain siisimoma, ‘Opora fain Mua Maneka Muuka ona opora-ke. Muuka eena mokoka mukuna saarik wilinem-ikaiya ne kepur onoma nomon oka wiliniya nain saarik wilinem-ikua nain. 19Feenap maek, ni uuwowa oniman nain yo niar amisarem. Ni mua wia kemaliman, yo opora efar opiman, mua oko wia asipiman ne niena kekanep ikeman. Ne fain pun niar amisarem, ni aakisa eliw akena uuwami iiriw uuwaman nain nomakeman.20Aria yo maa kuisow fain nia siririyem, emeria Yesebel ▼ naimik nain iirarowa nain ni me iirareman, nis-ke eliw naiwkin niamiya ikua. Emeria nain feenap wame maiya nain-ke, “Yo Mua Maneka profet-ke,” naap wame maiya. Os-ke yo uuwow mua teeria sira samora wia ofakowak. Naeya wi enum eruarimik ne maa enowa iiriw inasina wia patiramik nain enimimik. 21O sira samora nain piipuap kema kirinok naep epa iwem-na wia, kema-ko me kiriya. 22Naapeya ikoka napum maneka iwinen. Wi mua o wameiya pokam-ikemik nain pun naap, sirirowa wiemkun unow onaiya sirirowa maneka aawikuan. Wi kema kirikuan-na me wia samorinen. 23Ona teeria o ookam-miemik nain wia ifakimemkun wi sios unowa nain urufap sira efa amisaruk. Ne fain pun efar amisarikuan. Yos-ke wi mua kema kamenap nain baliwep wiar amisarep wi unowiya kuisow kuisow sira kamenap onam-ikua nain kiripomiyem.
24Aria ni Taiyataira unowa emeria nain opora me wiar ookaman ne teeria fain opora me wiar aaweman, wi feenap maimik nain, “I Satan kokot maa nain wiar amisaremik,” wi nain. Ni teeria nain feenap nia maakiyem, yo yoowa oko-ko me niinen. 25Ni fain muutiw onam-ikeka, kekanep opora aakisa opap ikeman nain naap opam-ikeka, ikip yo nainiw ekapow fofa-pa. 26Wi teeria nomakep yo uuwowa naap onam-ikok umimik nain ikoka kekanowa wiinen. Naeya wi miiw unowa wia urufam-ikaikuan. Kekanowa wiemkun saria maneka arep aen kuuma opap miiw unowa kekanowa wia urufam-ikaikuan. Amina wafuriwkin pukep ititaliya naap, mua pun naap wia samo-samorikuan. Ne epa wiimow mokoma unuma Kuaidama nain pun wiinen. 29Ni ifan onaiya ikok-na Ewar Eliwa wi sios wia maakiya nain miimeka!’”
Copyright information for
MHL